【UTMB🗻】廈門Xiamen [2 Mar 2025] 「足本版」起點＞CP1＞CP2

今個比賽旅程真係好開心！！
報名後要等抽籤結果，好擔心得自己一個去比賽。好幸運，三個一齊中籤！
我對廈門係零認識，搜尋一下，廈門都幾大，景點都幾多。第一最想去睇下土樓，其次係鷺江夜景。
第一日，坐高鐵上去都好方便，約4小時車程，到步後放低行李後就去拎選手包，可惜現場無咩UTMB產品買，(去左法國UTMB既又無買手信比我😥)。但個選手包都唔錯，個側揹袋都幾靚。拎完之後順著中山路精品街行返酒店，食下野睇下野，都唔可以太夜休息，明天一早去觀光。
第二日，一早起身食早餐，見到既人都係50km/100km參賽選手，傾左幾句再祝佢地安全完賽喇！跟著就包左車去土樓觀光，車程都要2小時。土樓的確幾特別，喜歡睇下新奇事物既人，值得去參觀一下。我地去左田螺坑，睇“四餸一湯”，之後經過“塔下村”，直頭係拍戲既場景咁，我好想落車周圍行下影相😂。去到“雲水謠”睇下大水車，大榕樹，同埋最高既方型土樓“和貴樓”，仲要係興建係沼澤地之上，真係神奇。回程返到同安區，司機介紹我地食當地出名既鴨仔粥，再食埋廈門出名既沙茶麵。買定聽朝既早餐就返酒店休息及執比賽物資喇。
第三日，比賽日。比昨日還要早起身，食左個杯麵，飲杯咖啡。雖然都係唔夠瞓，但狀態可以！打車去起點，一直天陰陰，起步前仲落著綿密密的雨。無見到香港人，周圍全部都係國內選手。一鳴槍，全部人都跑喎，可能我地早上線，所以身邊都係跑得之人。頭6km都係石屎路，無塞車，跑入村，成地下雞屎🤣，條河就係用黎養鴨？🤣村民都好熱情叫我地“加油”！
CP1之後既上山路段都幾好玩，一係唔上，一上就係好急既山路，落山就無咁斜，幾好跑，係樹林入面跑，都唔知幾時停左雨，總之唔落雨就精神喇！
CP2之後會兜返去CP1作為第3個CP，再之後又會行第二條路返去起點作為終點。中段打後仲有d崎嶇山路玩，想快都快唔到既路。條路好原始，因為好多路都係為左個比賽新開闢出黎，好好玩👍🏻！
CP3之後返終點前條rolling路就真係想講粗口，勁鬼多石級，又上又落。跑左25km已經好鬼攰，仲要玩呢d體力挑戰。個比賽係20km系列，但實際跑左28km，不過30km都應付到既，慢慢跑返去喇。結果係無目標時間既情況下做左個sub5，滿意收貨，主要係覺得非常好玩，享受😍，順利完賽！話哂呢個比賽係我第一個UTMB既山賽喎，但短期內亦係我最後一個山賽，人生真係矛盾😅！想慢慢享受下都唔得，比d隊友迫著我跑，享受得5小時。但有你兩個同我一齊跑係抵返既，多謝🙇🏻‍♂️ Bor KWONG & June WONG。仲有完賽後去食肥牛火窩簡直係一絕呀！
而最尾一日，朝早我地留左係酒店休息，我就拿拿淋剪片。悠悠閒閒咁過左大半日，由廈門北站坐BRT去廈門站都要1小時，係廈門站附近閒逛下就坐高鐵回港了。